გრიგოლ რობაქიძის სახელობის უნივერსიტეტი იწყებს „სტუდენტთა კარიერული განვითარებისა და დასაქმებისათვის საჭირო უნარ-ჩვევების განვითარების პროექტს“.

პროექტის ხელმძღვანელია უნივერსიტეტის მიერ მოწვეული ექსპერტი, ადამიანური რესურსების მართვისა და ზრდასრულთა განათლების სპეციალისტი - მაკა კუკავა.

პროექტში მონაწილეობა შეუძლიათ საბაკალავრო პროგრამის: მე-3 და მე-4 კურსის სტუდენტებს.

მონაწილეების შერჩევა განხორციელდება უნივერსიტეტის ბაზაზე, პროექტის ხელმძღვანელისა და უნივერსიტეტის წარმომადგენლების მიერ

პროექტში მონაწილეობისათვის გასაუბრების წესით (გასაუბრება გაიმართება პარასკევს, 9 ნოემბერს, 14.00 საათზე, აუდიტორია № 103).

ამ ეტაპზე შეირჩევა 25 სტუდენტი, რომლებიც გაივლიან პრაქტიკულ ტრენინგებსა და შეხვედრებს საჯარო დაწესებულებებისა და ბიზნესორგანიზაციების ადამიანური რესურსების მართვის მიმართულების ხელმძღვანელებთან.

• პროექტში მონაწილეობის მისაღებად გთხოვთ გაიაროთ რეგისტრაცია შესაბამის ბმულზე

სტუდენტთა რეგისტრაცია დაიწყება 3 ნოემბერს და დასრულდება 8 ნოემბერს, 18:00 საათზე.

მონაწილეთა შერჩევა განხორციელდება შემდეგი კრიტერიუმების გათვალისწინებით:

პიროვნული თვისებები

• ლიდერობა;
• თავდაჯერებულობა;
• კრიტიკული აზროვნება;
• აზრის ნათლად გამოცემა/ჩამოყალიბებისა და დამარწმუნებელი კომუნიკაცია;
• ეფექტური მოსმენა, ეფექტური ვერბალური და არავერბალური კომუნიკაცია;
• პოზიტიური პიროვნული ქცევები და დამოკიდებულებები;
• მიზანზე ორიენტირებულობა.

ზოგადი მახასიათებლები:

• კარგი ზოგადი ცოდნა (ერკვევა სხვადასხვა თემაში და შეუძლია თემის ირგვლივ შინაარსობრივი დისკუსია);
• ორატორული ლოგიკა და დამაჯერებელი კომუნიკაცია;
• დროის მართვა;
• პრეზენტაბელურობა;
• სოციალური უნარები (კომუნიკაცია, ქცევა და ეტიკეტი).

შინაარსობრივი მახასიათებლები:

• მიღებული ინფორმაციის ანალიზი და უკუკავშირი;
• კითხვებზე ლოგიკური და თანმიმდევრული პასუხები;
• საკუთარი მოსაზრებების ჩამოყალიბება დამაჯერებლად და არგუმენტირებულად;
• ინფორმაციის გადმოცემისას ფაქტებისა და კონკრეტული მაგალითებით საკუთარი მოსაზრებების გამყარება.

ტრენინგი გაიმართება კვირაში ერთხელ, ხანგრძლივობა 2-3 საათი.

კარიერული განვითარების პროექტის ფარგლებში დაგეგმილი პრაქტიკული ტრენინგები და შეხვედრები:

I შეხვედრა - გაცნობა, მონაწილეთა მოლოდინისა და პროექტის შედეგების ჩამოყალიბება;

II შეხვედრა - ორგანიზაციული სტრუქტურის ჩამოყალიბება, პერსონალის როლი და ფუნქციები ორგანიზაციაში, ძირითადი სამუშაო აღწერილობები და სამუშაოს ეფექტიანობისთვის საჭირო კომპეტენციების განსაზღვრა (სტუდენტები ექსპერტის ფასილიტაციით თავად იმუშავებენ ამ საკითხებზე და განიხილავენ თითოეულ ნამუშევარს);

III შეხვედრა - საკუთარი შესაძლებლობების, უნარების, პიროვნული თვისებებისა და ინტერესების იდენტიფიცირება (პროფესიული ორიენტაცია, პიროვნული მახასიათებლები, მოტივაციური ფაქტორები, საჭირო უნარების განვითარების ღონისძიებები);

IV შეხვედრა - საკუთარი რეზიუმეს შედგენა კონკრეტული პოზიციის მოთხოვნების გათვალისწინებით და დამსაქმებელთან კომუნიკაციის პირველი ეტაპი;

V და VI შეხვედრა - ინტერვიუს მიმდინარეობა, მისი დინამიკა და ტექნიკა (დემოგრაფიული ინტერვიუ, ჩაღრმავებული ინტერვიუ, ქეისინტერვიუ, პროფესიული ინტერვიუ
evidens based interiew, პროექციული ინტერვიუ);

VII შეხვედრა - ადაპტაცია სამუშაოსთან და ორგანიზაციულ კულტურასთან ;

VIII შეხვედრა - პანელური დისკუსია საჯარო უწყებების ადამიანური რესურსების მიმართულების ხელმძღვანელებთან;

IX შეხვედრა - პანელური დისკუსია კერძო კომპანიების ადამიანური რესურსების მიმართულების ხელმძღვანელებთან.

ტრენინგის წარმატებით გავლის შემთხვევაში გაიცემა სერტიფიკატი.

გისურვებთ წარმატებას!