საქართველოს განათლებისა და მეცნიერების სამინისტრომ მეცნიერ ქალთა და გოგონათა საერთაშორისო დღესთან დაკავშირებით გრუნის აფილირებული ასისტენტ-პროფესორი მარიამ ლაშხი მეცნიერების განვითარებაში შეტანილი წვლილისთვის დააჯილდოვა.

მარიამ ლაშხი რამდენიმე ათეული სამეცნიერო პუბლიკაციის ავტორია, მისი სამეცნიერო ნაშრომები გამოქვეყნებულია SCOPUS-ის და ELSEVIER-ის წამყვან სამეცნიერო ბაზებში განთავსებულ ჟურნალებში, მათ შორის, ერთი - მონოგრაფიის სახით. სხვადასხვა დროს მარიამი მონაწილეობდა არაერთ ადგილობრივ და საერთაშორისო პროექტში როგორც ექსპერტი, კონსულტანტი და კოორდინატორი, მათ შორის, ისეთი ორგანიზაციების პროექტებში, როგორებიცაა: World Economic Forum (შვეიცარია), USAID (აშშ), Carnegie Endowment for International Peace (აშშ), შოთა რუსთაველის ეროვნული სამეცნიერო ფონდი და სხვა. ამჟამად მარიამი არის დოქტორანტი და აკადემიურ/სამეცნიერო საქმიანობის გარდა მუშაობს საერთაშორისო კომპანია PricewaterhouseCoopers-ში (PWC).

11 თებერვალი - მეცნიერ ქალთა და გოგონათა საერთაშორისო დღე - გაეროს გენერალური ასამბლეის რეზოლუციის თანახმად, 2015 წლიდან აღინიშნება. მისი მიზანია მეცნიერებით დაინტერესებულ ქალთა და გოგონათა ხელშეწყობა, მეცნიერების, ინოვაციებისა და ტექნოლოგიების სისტემაში მათი მზარდი როლის მხარდაჭერა და გენდერული თანასწორობის უზრუნველყოფა.