2024 წლის 10 დეკემბერს, ადამიანის უფლებათა საერთაშორისო დღესთან დაკავშირებით, გაიმართა საჯარო დისკუსია: „ქართული კვალი აფხაზეთში და მისი შენარჩუნებისა და დაცვის სამართლებრივი მექანიზმები“.

ცხუმ-აფხაზეთის მეცნიერებათა აკადემიის მიწვევით, დისკუსიას უძღვებოდა გრუნის ასოცირებული პროფესორი - გოჩა ოჩიგავა.

შეხვედრა გახსნა აკადემიის პრეზიდენტმა, ფიზიკა-მათემატიკის მეცნიერებათა დოქტორმა, პროფესორმა თემურ ჩილაჩავამ. დისკუსიაში მონაწილეობდნენ მეცნიერები, რომლებმაც თავიანთი კვლევითი საქმიანობა დაუკავშირეს საქართველოს ოკუპირებული ტერიტორიების შემსწავლელ მეცნიერებას, ასევე, სხვადასხვა უმაღლესი სასწავლებლის პროფესორები, სამეცნიერო-კვლევითი ორგანიზაციების წამომადგენლები და სხვ.

გრუნის პროფესორის მიერ წარმოდგენილ პრეზენტაციაში ყურადღება გამახვილდა ისეთ მნიშვნელოვან საკითხებზე, როგორებიცაა:

• იუნესკო და მისი ფუნქცია კულტურული ძეგლების დაცვისა და მათი ავთენტურობის შენარჩუნების პროცესში;
• საქართველო და იუნესკო;
• ეთნოციდი - ხალხის კულტურის განადგურება აფხაზეთში და კულტურული უფლებების აღდგენის სამართლებრივი მექანიზმები;
• აფხაზეთში არსებული ხუროთმოძღვრების უნიკალური ძეგლების დაცვის დროებითი ღონისძიებები;
• აფხაზეთის საკითხებზე მომუშავე ახალგაზრდა მკვლევრების ხელშეწყობის სახელწიფო პროგრამა;
• აფხაზეთის ისტორიული ძეგლების ამჟამინდელი მდგომარეობა და სხვ.

შეხვედრაზე აღინიშნა ცხუმ-აფხაზეთის მეცნიერებათა აკადემიასა და გრუნის შორის კვლევითი მიმართულებით თანამშრომლობის მნიშვნელობა, გამოითქვა კონკრეტული წინადადებები.

გრუნი მომავალშიც აქტიურად ჩაერთვება საქართველოს ოკუპირებული ტერიტორიების პრობლემატიკის შემსწავლელი მეცნიერების განვითარებასთან დაკავშირებულ ღონისძიებებში.