2024 წლის 16 ნოემბერს გრიგოლ რობაქიძის სახელობის უნივერსიტეტის მხარდაჭერითა და ასოცირებული პროფესორის მაკა ფირანაშვილის ხელმძღვანელობით, ტურიზმის საბაკალავრო პროგრამის სტუდენტებისთვის ჩატარდა სასწავლო-შემეცნებითი ტური მესხეთში.

ტური მიზნად ისახავდა საქართველოს ტურისტულ-რეკრეაციული რესურსების გაცნობას, კერძოდ, მესხეთის რეგიონის შესწავლას. სტუდენტებმა პროფესორთან ერთად შეადგინეს და დაამუშავეს მარშრუტი, მოამზადეს სასწავლო თემატიკა და მოინახულეს X საუკუნის საფარისა და XIII-XIV საუკუნის ზარზმის მონასტრები.

პროგრამით განსაზღვრული გასვლითი ლექციის ფარგლებში, ეწვივნენ ახალციხეს, რაბათის ციხეს, რომელიც ძველი მესხეთის მთავარ ქალაქსა და სამცხის ათაბაგთა რეზიდენციას წარმოადგენდა. ციხე-კომპლექსის ტერიტორიაზე სტუდენტებმა დაათვალიერეს გალავანი, ციტადელი, IX-X სს-ის მართლმადიდებლური ტაძარი, ჰაჯი ახმედ-ფაშა ჯაყელის სახელობის მეჩეთი, მედრესე, მინარეთი და ჯაყელების სასახლე, რომელშიც განთავსებულია სამცხე-ჯავახეთის ისტორიის მუზეუმის საგამოფენო დარბაზი.

ტურის ბოლოს სტუდენტებმა წარმოადგინეს თემები საქართველოს მრავალფეროვანი და საინტერესო ტურისტული დანიშნულების ადგილების შესახებ, მათი მნიშვნელობისა და მართვის გათვალისწინებით.